पिंपरी, ता. ८ - संगमनेर- सिन्नर रस्त्यावर शनिवारी पहाटे झालेल्या अपघातात सेवा विकास सहकारी बॅंकेचे संचालक जयराम भीवराव पालवे (वय -४८) यांच्यासह दोघांचा मृत्यू झाला. या घटनेमुळे पिंपरीत शोककळा पसरली.
श्री. पालवे यांचे मित्र विजय व्यवहारे यांच्या आईचे नाशिकमध्ये नुकतेच निधन झाले. त्यामुळे व्यवहारे कुटुंबीयांचे सांत्वन करण्यासाठी श्री. पालवे, त्यांचे मित्र ईश्वर परशुराम पाचपुते (वय- ४०), अतुल रामदास शिणकर, त्यांच्या पत्नी उज्ज्वला व मुलगा सुमित असे पाच जण श्री. वाणी यांच्या मोटारीतून शुक्रवारी रात्री साडेदहाच्या सुमारास पिंपरीमधून निघाले. त्यांची मोटार संगमनेर- सिन्नर रस्त्यावरील गोरेवाडीजवळ थांबलेल्या ट्रकवर शनिवारी पहाटे साडेतीनच्या सुमारास पाठीमागून धडकली. त्यात श्री. पालवे व श्री. पाचपुते यांचा जागीच मृत्यू झाला. श्री. वाणी त्यांच्या पत्नी व मुलगा असे तिघे जण जखमी झाले आहेत.
श्री. पालवे यांच्यावर पिंपरीतील स्मशानभूमीत अंत्यसंस्कार करण्यात आले. पालवे सेवा विकास सहकारी बॅंकेच्या संचालक मंडळावर नुकत्याच झालेल्या निवडणुकीत विकास पॅनेलतर्फे विजयी झाले होते. त्यांच्या मागे आई, वडील, पत्नी, दोन मुले आणि तीन भाऊ असा परिवार आहे. त्यांचा वाहतुकीचा व्यवसाय होता. त्यांच्या अंत्यविधीला सर्व स्तरातील नागरिक, नगरसेवक, सेवा बॅंकेचे कर्मचारी, अधिकारी, संचालक उपस्थित होते.
श्री. पाचपुते आणि अतुल वाणी नातेवाईक आहेत. श्री. पाचपुते यांच्यावर त्यांच्या मूळगावी धुळे येथे अंत्यसंस्कार करण्यात आल्याचे त्यांच्या निकटवर्तीयांनी सांगितले. ते पुण्यात राहत होते, तर श्री. वाणी हे पिंपरीतील वैभवनगर येथे राहण्यास होते. गणेशनगरमध्ये त्यांचे औषधाचे दुकान आहे.